27/Aprel/2023 Dolzarb
TOSHKENT, 27-aprel. /“Dunyo” AA/. Bugun ertalab Xalqaro kongress markazida maxsus matbuot markazi ish boshladi, unda 80 dan ortiq mahalliy va 40 dan ortiq xorijiy ommaviy axborot vositalari vakillari ikkinchi Toshkent xalqaro investitsiya forumi (TXIF) tafsilotlarini tezkorlik bilan yoritish imkoniyatiga ega bo‘ladilar, deb xabar bermoqda «Dunyo » AA muxbiri.
Davlatimiz rahbari matbuot kotibi Sherzod Asadovning maʼlum qilishicha, TXIF-2023 yalpi majlisida O‘zbekiston Prezidenti ishtirok etadi va nutq so‘zlaydi.
Forum davomida O‘zbekiston va Markaziy Osiyoning investitsiyaviy salohiyatini atroflicha ochib berishga qaratilgan yalpi majlis, ekspertlarning 30 dan ortiq qizg‘in bahs-munozaralari, panel munozaralari, davra suhbatlari va B2B-muzokaralari o‘tkazilishi rejalashtirilgan.
Matbuot markazi jurnalistlarning tezkor faoliyat yuritishi uchun zarur bo‘lgan zamonaviy texnologiyalar, xususan, telefonlar, yuqori tezlikdagi internet bilan taʼminlangan.
Forum o‘z ishini 28 aprelga qadar davom ettiradi.