24/Sentabr/2023 Iqtisodiyot
TOSHKENT, 24-sentyabr. /“Dunyo” AA/. Davlatimiz rahbarining «O‘zbekistonda davlat-xususiy sheriklik loyihalarini ishlab chiqish jamg‘armasini tashkil etish chora-tadbirlari to‘g‘risida»gi qaror qabul qilindi, deb xabar bermoqda “Dunyo” AA muxbiri.
Hujjatga ko‘ra, Yevropa tiklanish va taraqqiyot banki (YETTB) tomonidan O‘zbekistonda davlat-xususiy sheriklik loyihalarini ishlab chiqish jamg‘armasini boshqarish guruhi tashkil etilmoqda.
Maʼlumot uchun: Jamg‘arma YETTB boshqaruvida 5 yil muddatda (keyinchalik uzaytirish sharti bilan) bo‘ladi.
Qarorda qayd etilishicha, Jamg‘arma YETTB tomonidan jalb etiladigan 10 million yevro miqdoridagi grant va YETTB tomonidan respublikaga taqdim etiladigan 10 million yevro miqdoridagi kredit mablag‘lari hisobidan shakllantiriladi.
Jamg‘arma tomonidan umumiy qiymati 10 million AQSH dollari ortiq bo‘lgan DXSH loyihalari bo‘yicha konsultantlar xizmati moliyalashtiriladi.
Shuningdek, umumiy qiymati 10 million dollar ekvivalentidan ortiq bo‘lgan DXSH loyihalari “SOURCE” xalqaro platformasida joylashtirib boriladi.
Bundan tashqari, ushbu qaror bilan YETTB tomonidan ajratiladigan qarz mablag‘larini qaytarishning prognoz jadvali tasdiqlanmoqda.