23/Sentabr/2023 O’zbekiston dunyo nigohida
QOHIRA, 23-sentyabr. /“Dunyo” AA/. O‘zbekistonning sayyohlik salohiyati Misrning yetakchi ommaviy axborot vositalari tomonidan keng targ‘ib etilyapti, deb xabar bermoqda “Dunyo” AA muxbiri.
Mamlakatimizning ushbu davlatdagi elchixonasi maʼlumotiga ko‘ra, joriy yilning 11 sentyabrdan eʼtiboran “DIGMO” kompaniyasi bilan hamkorlikda Misrning ommabop «Nile TV», «MBC TV», «MBC-2 TV» hamda mamlakatning iqtisodiy rivojlangan Iskandariya va Port-Said viloyatlarining hududiy «Al-Iskandaria TV-5», «Port-Said TV-4» telekanallarida O‘zbekistonning turistik salohiyatiga bag‘ishlangan videoroliklar namoyishi yo‘lga qo‘yildi. Yurtimizning tarixiy va zamonaviy sayyohlik yo‘nalishlari targ‘ibotiga bag‘ishlanggan ushbu loyiha bir oy davom etadi.
30 soniya davom etadigan mazkur videolavhalarda mamlakatimizning ziyorat turizmi imkoniyatlari, islom olamida mashhur bo‘lgan Samarqand, Buxoro va Xorazm kabi tarixiy shaharlarimizdagi tarixiy yodgorliklar, O‘zbekiston tog‘lari va xushhavo tabiati hamda Samarqand shahrida bo‘lib o‘tadigan BMT Jahon turizm tashkilotining (UNWTO) 25-sammiti haqidagi maʼlumotlar ingliz va arab tillarida tomoshabinlar eʼtiboriga havola etilmoqda.
Ushbu targ‘ibot roliklarida, shuningdek, Misr aholisi O‘zbekistonga tashrif buyurib, milliy oshxonamiz, go‘zal tabiatimiz va betakror shaharlarimiz arxitekturasidan bahramand bo‘lishga daʼvat etilgan.