01/Iyul/2023 Sanalar
PEKIN, 1-iyul. /“Dunyo” AA/. 30-iyun – O‘zbekiston yoshlari kuni munosabati bilan mamlakatimizning Xitoydagi elchixona tomonidan «Olg‘a, O‘zbekiston!» shiori ostida vatandoshlar o‘rtasida futbol turniri tashkil etildi, deb xabar bermoqda “Dunyo” AA muxbiri.
Musobaqa avvalida ishtirokchilar hukumatimiz tomonidan amalga oshirilayotgan yoshlarga oid davlat siyosatining mazmun-mohiyati bilan tanishdilar. Shuningdek, yurtdoshlarimizga joriy yil 9 iyul kuni bo‘lib o‘tadigan muddatidan ilgari O‘zbekiston Prezidenti saylovi jarayonlari haqida so‘zlab berildi va ular ushbu siyosiy tadbirga faol ishtirok etishga daʼvat etildi.
Bundan tashqari, mamlakatimiz elchixonasi tomonidan Pekin Xalqaro biznes va iqtisodiyot universitetida O‘zbekiston yoshlari kuniga bag‘ishlangan maʼrifiy tadbir tashkil etildi. Uchrashuvda mazkur universitetda tahsil olayotgan o‘zbekistonliklar ishtirok etishdi.
Tadbirda davomida O‘zbekiston Prezidentining yoshlarga yo‘llagan bayram tabrigining mazmun-mohiyati haqida so‘zlab berildi. Mamlakatimiz rahbariyati tomonidan yoshlarimizning har tomonlama barkamal va yetuk mutaxassislar bo‘lib yetishishlari uchun yaratilayotgan imkoniyatlar taʼkidlandi. Shuningdek, bo‘lajak muddatidan ilgari O‘zbekiston Prezidenti sayloviga ko‘rilayotgan tayyorgarlik ishlari, muddatidan ovoz berish tartiblari haqida aytib o‘tildi.
Uchrashuvda so‘zga chiqqan vatandosh talabalar davlatimiz rahbari tomonidan yoshlarga ko‘rsatilayotgan yuksak eʼtiborni yuqori baholab, 9 iyul kuni bo‘lib o‘tadigan muddatidan ilgari Prezident saylovida faol ishtirok etishlarini bildirishdi.
Kecha, shuningdek, echixona huzuridagi 49-saylov uchastkasida muddatidan ilgari O‘zbekiston Prezidenti saylovida muddatidan oldin ovoz berish uchun kelgan bir guruh yosh vatandoshlar ishtirokida 30 iyun - Yoshlar kuniga bag‘ishlab davra suhbati o‘tkazildi.